Жапониямен сауда-экономикалық байланыс нығаяды

Жапония мемлекетінің ғылым мен техниканың дамуынан әлемдегі көш бастаушы елдердің қатарында екені талассыз. Сол себепті бұл елмен серіктес болудан ешкімнің ұтылмасы анық. Осыны орынды ескерген Түркістан облысының әкімі Өмірзақ Шөкеев апта басында Жапонияның Қазақстандағы Төтенше және Өкілетті Елшісі Тацухико Касаи мырзаны және жапондық Kawasaki мен Marubeni компаниясының өкілдерін қабылдады.

«Кездесуде тараптар екіжақты қарым-қатынастарды дамыту мәселелерін талқылады. Аймақ басшысының айтуынша, Жапония Қазақстан Республикасы үшін және Түркістан облысына маңызды стратегиялық серіктестердің бірі. Күншығыс елінен өңірге гербицидтердің үлкен көлемі импортталады. «Түркістан облысы мен Жапония арасында өзара тиімді өндірістік, сауда-экономикалық және инвестициялық ынтымақтастықты арттыру үшін үлкен перспективалар бар екеніне сенімдімін. Біз бірлескен жобаларды іске асыру үшін толық қолдау көрсетуге дайынбыз», – деді Өмірзақ Шөкеев.

Сонымен қатар, облыс әкімі Түркістан өңірінің туризм және аграрлық өнеркәсіп саласындағы жоғары әлеуетін атап өтті. Осылайша, алдағы уақытта шет елдіктермен ортақ мүддеміз ұштасқан жобаларды іске асыруға қазақстандық және жапондық компаниялар тартылуы мүмкін. Kawasaki компаниясы Түркістан қаласындағы 50 мвт бу-газ электр станциясын салу жобасы үшін өз технологиясын ұсынды. Өз кезегінде облыс әкімі жапондық өнім сапасын жоғары бағалайтындығын білдірді. Алдағы конкурстарға қатысуды ұсынып, сәттілік тіледі.

Айта кету керек, биылғы жылдың сегіз айының қорытындысы бойынша облысымызға Жапониядан жалпы сомасы 513 мың АҚШ долларын құрайтын тауарлар импортталған. Оның басым бөлігі автомобильдер мен олардың жиынтықтары, гербицидтер мен электр құралдары. Қазақстанда қазірдің өзінде жапон капиталының қатысуымен мұнай мен газ, металлургия, қаржы, тау-кен өнеркәсібі, автомобильдерді көтерме бағамен сату, электр байланысы, ағаш дайындау және логистика сияқты салаларда 80-ге жуық кәсіпорын жұмыс істейді», – деп хабарлайды Түркістан облысы әкімінің баспасөз қызметі.  

Жері кілең аралдардан тұратын жапон елімен байланысты нығайтып, ол жақтан соңғы үлгідегі сапалы техниканы тасымалдап, оларға табиғи, экологиялық тұрғыда таза азық-түлік өнімдерін көптеп экспорттауға қол жеткізер болсақ, облыс тұрғындарының ұтары мол болатыны анық. Міне, осы бастамаға жол салған облыс басшысының саясаты көпшіліктің көңіліне қуаныш ұялатып отыр. Лайым, бастама баянды болғай!