«Гүлдер» – Түркістанның көркін аша түсті

Түркістан қаласындағы Есім хан алаңына жаңаша көрік берген «Гүлдер» саябағы ресми түрде ашылды. Салтанатты шараға Түркістан облысының әкімі Өмірзақ Шөкеев пен қала əкімі Рашид Аюпов, сондай-ақ, зиялы қауым өкілдері келіп, гүлзарлы орынның лентасын қиды.

«Еліміздің жауһарына айналатын Түркістандағы әрбір нысан біз үшін аса маңызды. Мұндай орындарды жаңғырту арқылы біз тұрғындарға жайлылық пен ыңғайлылық танытуды көздейміз. Ендеше, жаңа саябақ құтты болсын! Туыстарыңыз, дос-жарандарыңызбен керемет кеш өткізудің таптырмас орны боларына кәміл сенімдімін», – деді аймақ басшысы Өмірзақ Естайұлы.

Аталған демалыс орны «Түркістан жарық-тазалық» жауапкершілігі шектеулі серіктестігінің мердігерлік еткен кезекті жобасы. Абаттандыру жұмыстарына екі айдың көлемінде уақыт кеткен. Демалыс орнында диаметрі 35 метрлік субұрқақ, 10 үлкен және 72 кіші жарықшамдар, хоббиттер үйі, орталықтар, көгал және гүлдер қойылған. Алдағы көктемде мұнда раушан және басқа да сан алуан түрлі гүлдер егіледі.

Түркістанда саябақтар саны алдаға уақытта да артатын болады. Олардың барлығында бір-бірін қайталамайтын өзіндік ерекшелігі болмақ. Жақын уақытта құрылыс жұмыстары қарқынды жүріп жатқан Отырар мөлтек ауданындағы әкімшілік-іскерлік орталықта жаңа алаң бой көтереді. Жыл соңына дейін Түркістан қаласындағы «Жеңіс» саябағы мен кіші аллея қайта жөндеу жұмыстарынан кейін пайдалануға берілмек. Сонымен қатар, қаланың шеткі аумағында салынып жатқан тағы да сегіз аллеяның ашылуы күтілуде.