«Жолаушылар тасымалы» АҚ пойыз билеттерін және оның ақшасын қайтару бойынша сұрақтарға жедел жауап беретін «уатсап» нөмірін іске қосты. Осыған сәйкес енді ақшаны қайтару билетті сатып алу әдісіне қарай қолма-қол ақшамен және қолма-қол ақшасыз іске асырылады.
Жаңа тәртіп бойынша енді стансадан пойыз жөнелтілгенге дейін 1 сағаттан кешіктірмей билетті қайтарған жағдайда қаражат бес жұмыс күні ішінде төлеушінің картасына түседі. Ал, стансадан пойыз жөнелтілгенге дейін 1 сағаттан аз уақыт қалғанда билетті қайтарған жағдайда қаражат жолаушының өтініші негізінде 30 күнтізбелік күн ішінде жолаушының картасына түседі. Билет құнын қайтара алмаған жолаушылар +7 -707-270-36-64 нөміріне хабарласа алады.
«Өтініш білдірген кезде билеттің нөмірін көрсету керек немесе билет кассасына жүгінгенде жол жүру құжатын қайтару туралы түбіртекті жіберу қажет», – делінген ақпаратта. Айта кетерлігі, билетті қайтарған кезде пойыз жөнелтілгенге дейін 24 сағаттан кешіктірілмесе оның құны толық қайтарылады. «Ал, 24 сағаттан кешіктіріліп, бірақ пойыз жөнелтілгенге дейін кемінде 6 сағат бұрын өткізілсе билет құнының елу пайызы қайтарылады. Пойыз жөнелтілгенге дейін кемінде 6 сағат бұрын және жөнелтілгеннен кейін 1 сағаттан артық емес уақытта өткізілсе билет құны қайтарылып, плацкарт құны толық ұсталады. Сондай-ақ, пойыз кетіп қалған соң 1 сағаттан соң билетті қайта өткізуге болмайды және оның ақшасы қайтарылмайды. Егер пойыз қатынауы тоқтаған жағдайда жолаушылар билеттерін қайта ресімдеп, қаражатын толық қайтарып ала алады. Оны сатып алған жерге өткізу керек», – дейді «Жолаушылар тасымалы» АҚ-ы.
