Мұғалімдері жиі арыз жазатын аудандар: Мақтаарал, Сарыағаш, Төлеби...
МәселеЖариялаған: admin | Уақыты: 2025-03-16 18:20:00 |
Бөлісу: Facebook | Whatsapp | Қаралым саны: 308
Наурыз айынан бастап Түркістан облысының білім саласында сапаны қамтамасыз ету департаментінің басшысы Ғалымжан Алматов аудандарды аралауды бастады. Ғалымжан Бауыржанұлы облыстық еңбек инспекциясы мен кәсіподақ басшыларының қатысуымен Мақтаарал, Сарыағаш, Төлеби аудандарында болып, аудан тұрғындарының арыз-шағымдары бойынша қоғамдық бақылау өткізді. Мұндағы мақсат жас және ардагер ұстаздармен, педагогикалық ұжыммен, әдеп кеңесінің мүшелерімен, мектеп директоры және балабақша меңгерушілерімен кездесіп, пікірлерін тыңдау. Ғалымжан Бауыржанұлы аталған аудандарды аралауының себебін ондағы арыз-шағымның көптігімен байланыстырды.
Сандарды сөйлетер болсақ, өзге құзырлы органдарды атамағанда аталған департаментке осы оқу жылының өзінде Мақтаарал ауданынан 71, Сарыағаштан 68, Төлебиден 17 арыз түскен. Тіпті, Мақтааралда бір мектептен бас-аяғы 27 арыз жазылған. Мұндай бір мектептен көп арыз жазылу жағдайы Сарыағаш ауданында да кездеседі. Сонда бұл мектептерде ұстаздар оқушыларға білім мен тәрбие бере ме, әлде бірінің үстінен бірі арыз жазумен айналыса ма? Көңілге қонбайтын келеңсіздіктердің көбі ұстаздарды жұмысқа қабылдау барысында өткізілетін конкурстарға, мектептерде орын алып жатқан заңбұзушылықтар, директорлардың іс-әрекеті, педагогикалық әдепті бұзу фактілері, сағат жүктемелерінің дұрыс бөлінбеуі секілді бей-берекетсіздіктерге қатысты. Мақтаарал ауданында сабаққа қатыстырылмағаны үшін үш адамға айыппұл да салынған.
Ғалымжан Алматовтың мәлімдеуінше, биыл Сарыағашта 64 білім беру ұйымының 57-сі, Төлеби ауданындағы 41 білім беру ұйымының 34-і аттестаттаудан өтпеген. Сондай-ақ, 4-9 сынып оқушыларының компьютерлік тестілеу нәтижелері сараланғанда үш ауданда да 9-сынып оқушыларының көрсеткіші көңіл көншітпейтіні айтылды. Өздеріңіз куә болып отырғандай, арыз-шағым бар жерде білім сапасының төмендеп кететінін осыдан-ақ байқауға болады. Ұстаздар өздерінің жеке бас мәселесін мектеппен байланыстырмауы керек. Әйтпесе бұдан бала зардап шегетінін олар түсінетін уақыт жетті.
Ешқандай мұғалім мәртебесі туралы арнайы заң болмаса да Кеңес Одағы кезінде ұстаздың беделі биік болатын, барлығы да айрықша құрметке лайық жандар еді. Ал бүгінде мұғалімдер мәртебесі заңмен қорғалса да қоғам арасында олардың абыройы төмендеп барады. Мектепте мұғалімдер көпшіліктің көзінше, оқушылардың ортасында екендіктеріне қарамастан өзара ұрысып-жанжалдасып жатса оларда қайдан бедел қалсын? Ал оны көріп өскен шәкірттен қандай болашақ күтуге болады? Сөйте тұра қазіргі жастар қатыгезденіп барады деп кінә артамыз. Кінә балаларда емес, ересектерде деген пікір нанымдырақ болса керек.
Департамент басшысының мұндай сапары өзге барлық аудандарда да жалғасын табуы тиіс. Өйткені, осы тектес келеңсіздік кез-келген ауданда, кез-келген мектепте кездесуі әбден мүмкін. Тіпті, талас жоқ десек те болады.
Ұ. ҮМБЕТ.