Шенеуніктертерді қысқарту керек!
СаясатЖариялаған: admin | Уақыты: 2025-03-17 15:45:00 |
Бөлісу: Facebook | Whatsapp | Қаралым саны: 312
Осылай деген заңгер Жангелді Сүлейменов әлеуметтік желіде мәселе қозғап, елдің назарын аудартуда. Тіпті «мемлекеттік аппараттағы шенеуніктер санын қысқарту туралы» петиция да жариялап үлгерген сияқты.
Бастамашының айтуынша, 2019 жылы Президент Қасым-Жомарт Тоқаев 2024 жылға қарай мемлекеттік қызметкерлер санын 25 пайызға қысқартатынын мәлімдеген. «Алайда бұл мәселенің жыл сайынғы жолдауларда үнемі айтылып келе жатқанына қарамастан, қойылған міндет әлі орындалған жоқ. Біз мұны саяси ерік-жігердің жоқтығы мен мемлекеттік аппараттың өз мүддесіне қайшы келетін реформаларды өз бетінше жүзеге асыра алмауымен байланыстырамыз», – дейді заңгер.
«Мемлекеттік аппараттағы қызметкерлер саны көбеймесе, азайып жатқан жоқ» деген белсенділер оларға жұмсалатын бюджет шығындарының көбейіп жатқанын алға тартуда. «Жалақы, іссапарлар, қызмет көрсету, көлік, ғимараттарды ұстау және басқа да шығындар жетіп артылады», – дейді петицияны жақтаушылар. Петицияда мынадай да жолдар бар: «Біздің есептеуіміз бойынша, бір мемлекеттік қызметшіні ұстауға бюджеттен оның жалақысынан 10 есе көп қаражат жұмсалады. Мысалы, егер жалақы 500 мың теңге болса, онда бір қызметкерге кететін жалпы шығындар айына 5 миллион теңгеге дейін жетуі мүмкін, – делінген петицияда. – Мемлекеттік аппарат өзін-өзі реформалауға мүдделі емес, сондықтан қысқарту бойынша қойылған міндетті орындау сыртқы сарапшыларды тартпай жүзеге аспайды. Мемлекеттік қызметкерлер санын қысқарту бюджеттен қомақты қаражатты үнемдеуге мүмкіндік береді. Бұл қаражатты әлеуметтік бағдарламаларға, денсаулық сақтау мен білім беруге, инфрақұрылымды дамытуға бағыттауға болады».
Бұл орайда Жангелді Сүлейменовті қолдаушылар тәуелсіз аудит жүргізіп, нақты жоспар әзірлеу мақсатында беделді шетелдік консалтингтік компаниялардың сарапшыларын тартуды ұсынып отыр. «Біз мұндай зерттеулерге жұмсалатын шығындар (жылына шамамен 2 миллиард теңге, 5 жыл бойы) бюджет қаражатын үнемдеудің есебінен өтеледі деп санаймыз. Бұл зерттеулерге қажетті қаражат форумдарға, симпозиумдарға, іссапарларға және қажетсіз тауарларды сатып алуға жұмсалатын шығындарды қысқарту есебінен табылуға тиіс», – делінген құжатта.
Аудит алдымен Астанадағы министрліктер, ведомстволар мен агенттіктерде, сондай-ақ облыстық әкімдіктерде жүргізілуі қажеттігін айтқан авторлар шененуніктердің қатысуымен болатын келеңсіз жәйттер аймақтарда жиі кездесетінін де тілге тиек етуде. Мысалы, Солтүстік Қазақстан облысында мемлекеттік қызметкерлер құмар ойын ойнаған. Әрине, бұл әдепсіздік анықталған соң олар жұмыстан шығарылған. Нақты айтқанда осы облыстың Ақжар ауданы құрылыс және сәулет бөлімінің бас маманы 1XBET букмекерлік кеңсесінде бәс тіккен. Мемлекеттік қызметкерлерге құмар ойындарға қатысуға салынған тыйым туралы талаптардың бұзылғанын прокурорлар анықтады.