Әкімнің беделі болсын десек...
МәселеЖариялаған: admin | Уақыты: 2025-03-24 15:45:00 |
Бөлісу: Facebook | Whatsapp | Қаралым саны: 140
Оқшау ой
Ауыл әкімдерін халық сайлап жатқанына бірнеше жыл болды. Бұл дұрыс бастама. Халық ауылға жаны ашып жұмыс істейтін адамды өзі таңдауы тиіс.
Осы өзгеріс енгізілген тұста енді ауыл әкімінің өз бюджеті болады, ауылдың көркеюіне тікелей үлесін қоса алады деген әңгімелер айтылып еді. Өкінішке қарай, сол уәде үдеден шықпай отыр. Ауыл әкімінің қолындағы қаржы мардымсыз, тіпті жоқ есебі. Керек десеңіз ол әкімдік қызметкерлерінің жалақысын да жаба алмайтын көлемде. Қолында қаржысы жоқ әкімнің сөзінде салмақ болушы ма еді? Қаржысы ғана емес, бірде бір техникасы да жоқ. Ауылда төтенше жағдай орын ала қалған жағдайда өздігінен ештеңе істей алмайды. Амалсыздан шаруаларға жалынышты болады. Олар өтінішін қабыл алып, бергісі келсе берді, бергісі келмесе «аулақ ойна» десе де ештеңе дей алмайды. Осыдан кейін ауыл әкімінде қайдан бедел болсын.
Ауылда жұмыссыз ретінде тіркелген азаматтар бар. «Мансап» орталығының жолдамасымен баратындықтан, солардың өзі ауыл әкімінің сөзін жүре тыңдайды. Әкім олардың жұмысына бақылау жасай алмайды немесе жасағысы келмейді. Біздің Қызылқұм ауылдық округінде шағын мақта өңдеу зауыты бар. Ауылды ұдайы шаңға көміп жатады. Соның басшысы да әкімнің сөзін тыңдамайды. Шаруалар мемлекеттік жеңілдікті ауданнан алатындықтан, олардың да әкімге ісі түспейді. Жергілікті әкімнің берген анықтамалары қазір еш жерге жарамсыз болып қалды.
Халыққа пайдасын тигізе алмайтын, беделден де жұрдай мұндай әкімдік бізге қажет пе? Қажет болмаса артық шығын жұмсамай, ауылдық әкімдіктерді жабу керек. Ал қажет болса, олардың беделін көтеріп, халыққа пайдалы құрылым ету керек. Ол үшін ең алдымен ауылдың кейбір мәселелерін шешуге мүмкіндік беретін бюджеті болуы тиіс. Ауылдық деңгейде шара көре алатындай құзырет керек. Сонда сөзі салмақталып, ел санасатын болады. Әйтпесе, өзі жалтақ күн кешіп, елді қалай басқармақ?
Қанат-Әлі Бегалиев,
Қызылқұм ауылы, Шардара ауданы.