Шымкентте су арнасы мемлекетке қайтарылды
ҚұқықЖариялаған: admin | Уақыты: 2025-03-27 16:45:00 | Соңғы рет жаңартылған уақыты: admin on
Бөлісу: Facebook | Whatsapp | Қаралым саны: 152
Бұл туралы алдымен заңгер, сотта Шымкент қаласы әкімдігінің мүддесін қорғаған адвокат Жания Бодау өзінің әлеуметтік желідегі парақшасында хабарлады. "Әділдік салтанат құрды!" деген ол өз жазбасында "Сот мәмілелерді жарамсыз деп таныды (Қазақстан Республикасының Азаматтық кодексінің 157, 158-баптары), демек, талап қою мерзімі қолданылмайды – заң мемлекет пен азаматтардың жағында. Енді "Водные ресурсы-Маркетинг" ЖШС мәміле бойынша алған барлық мүлікті қайтаруға міндетті" дей келе "Мемлекеттік меншікті қорғауға өз үлесімді қосқаныма қуаныштымын" деп түйіндеді.
Мәселенің мәнісі мынада. Бүгін Шымкент қаласының мамандандырылған экономикалық соты қалалық әкімдіктің «Су ресурстары-Маркетинг» ЖШС-не тиесілі бірқатар су жабдықтау және су бұру нысандары бойынша келісімшарттарды жарамсыз деп тану туралы талап арызын қанағаттандырып, аталған нысандарды мемлекет меншігіне қайтару туралы шешім шығарды.
"Бұл сот шешімі – жай ғана заңдық жеңіс емес. Бұл Шымкент тұрғындарының мүдделері мен маңызды су ресурстарын қорғау.
Қала әкімінің адвокаты ретінде заң бұзушылықтарды дәлелдеп, заңсыз мәмілелерді жойып, стратегиялық нысандарды мемлекет бақылауына қайтарғанымызға мақтанамын. Бұл процесс құқық пен заң үстемдік құруы тиіс, ал сыбайлас жемқорлық схемаларына жол берілмеуі керек екенін тағы бір дәлелдеді!" деген адвокат Жания Бодау сотта анықталған бірқатар мәліметтерді де жұртшылық назарына жайып салды.
Нақтырақ айтқанда сот тыңдалымы барысында стратегиялық маңызды нысанның жекешелендірілуі кезінде жіберілген заңбұзушылықтар анықталған. Соның ішінде Қазақстан Республикасының «Жекешелендіру туралы» заңына (5-бап) сәйкес, жекешелендіруге тек бірыңғай мүліктік кешен ретінде қарастырылатын мемлекеттік кәсіпорындар мен мекемелер жататыны назарға алынбаған. Атап айтқанда Қазақстан Республикасы Үкіметінің 1996 жылғы Қаулысына сәйкес, қаланың өмірлік маңызды қызметтерін қамтамасыз ететін нысандарды бірыңғай кешеннен бөлуге тыйым салынған.
Талапкер тараптың пікірінше, су арнасының құрылымын өзгерту және жекешелендіру туралы шешім қабылдаған тұлғалар бұл қадамның салдарын түсінбеуі мүмкін емес еді.
Сот тек бірқатар сатып алу-сату келісімдерін жою ғана емес, сондай-ақ бұрынғы жағдайды қалпына келтіру мақсатында «Су ресурстары-Маркетинг» ЖШС нысандарды мемлекет меншігіне қайтару міндеттемесін жүктеу туралы қаулы шығарды.
Сот "Ақбай-Қарасу", "Бадам-Сайрам", "Қызылсай" және "Тассай" су жинау нысандарына қатысты хаттамаларды заңсыз деп таныды. Сонымен қатар, «Уникансервис» (тазарту құрылғыларының иесі) және «ТрансВиК» құрамына енген автокөлік цехына қатысты шешімдер де заңсыз деп танылды. Сондай-ақ, жоғарыда аталған нысандарға қатысты бірқатар ЖШС арасында жасалған сатып алу-сату келісімдері де жарамсыз деп жарияланды.
Тексеру барысында анықталған заңбұзушылықтар да аз емес екен
Бұған дейін «Су ресурстары-Маркетинг» ЖШС-ы қызметін басқару барысында көптеген заңбұзушылықтар анықталған. Олар:
- мақсатсыз қаржы жұмсау;
- тарифтік түсімдер есебінен жеке гидроэлектростанцияға су жіберетін қысымды коллектор салынған, алайда ол қалалық қажеттіліктерге арналмаған;
- тарифтік қаражатты өзге жобаларға пайдалану;
- кәсіпорын қаражаты және Еуропалық банктің несиесі су арнасының негізгі қызметіне қатысы жоқ темірбетон бұйымдарын шығаратын цех салуға бағытталған;
- көрсетілмеген қызметтер үшін ақы алу;
- қаланың тұрғындарынан құбырларды «техникалық қызмет көрсету» үшін қаражат жинаған, алайда олар іс жүзінде қызмет көрсетпеген. Жылдық заңсыз төлемдер көлемі 59,8 млн теңгеге жеткен;
- инфрақұрылым тозу деңгейін бұрмалау. Бір жылдың ішінде су құбырларының тозу көрсеткіші жасанды түрде 10,72%-ға артық көрсетіліп, бұл қосымша инвестициялық қаражат алуға негіз болған.
"Сот шешімі заңды күшіне енгеннен кейін, нысандардың кешенді тексеру жүргізіліп, жаңғырту бағдарламасы әзірленетін болады" дейді Шымкент қаласы әкімінің баспасөз қызметі таратқан ақпаратта.