Майраға не болып жүр?
Мәдениет және өнерЖариялаған: admin | Уақыты: 2025-03-31 18:45:00 |
Бөлісу: Facebook | Whatsapp | Қаралым саны: 50
«Өмірде ең қиыны – сатқындар арасында жұмыс істеу екен». Өзінің инстаграмдағы парақшасында осылай деген танымал опера әншісі Майра Мұхаммедқызы әлеуметтік желідегі жазбаларында соңғы кездері денсаулығы болмай жүргенін де тілге тиек етті. Өздеріңізге белгілі Майра Мұхаммедқызы бүгінде Шымкент опера театрының басшысы. Ол Қытайда, нақтылай айтсақ,1969 жылы 5 қыркүйекте Қытайдың Құлжа қаласында, өнерлі отбасында туып өскен. Қазақстанға 1994 жылы көшіп келді. Әкесі Мұхамед Әбдіқадырұлы – композитор, профессор, музыка зерттеу саласы бойынша көптеген кітаптардың авторы. Анасы Камал Қуанышқызы – әнші, ҚХР Халық әртісі.
Майра Мұхамедқызының өзі Бейжің Ұлттар Университетінің Музыка Факультетін және Пекин Консерваториясын бітірген. Алматыда Құрманғазы атындағы Қазақ ұлттық консерваториясында іс-тәжірибеден өтіп, 2003-2005 жылдар арылығында Париждегі «Гранд Операда» Қазақстанның атынан өнер көрсеткен тұңғыш әрі әзірге жалғыз опера әншісі.
Естеріңізде болса ол 2005 жылы Пласидо Домингоның шақыруымен АҚШ-тағы Вашингтон Ұлттық Опера Театрында өнер көрсетті.
Ал Шымкенттегі опера және балет театрында 2021 жылдан бері басшылық етіп келеді.
«Жуырда спортзалдан кейін хамамға кірген сәтте кенеттен белім қатты ауырып, қозғала алмай қалдым. Бір апта бойы орнымнан тұра алмай, түрлі ем қабылдадым. Укол, дәрі, МРТ – ештеңе көмектеспеді. Керісінше, ісік пайда болып, жағдайым одан сайын қиындай түсті. Түсінгенім, бар шаруаны тоқтатып, өзімді қолға алуым керек екен. Астанадағы үйіме барып, тибеттік шөп дәрілерін қолдана бастадым. Соның арқасында аяққа тұрдым, денсаулығым да біртіндеп қалпына келе бастады», – дейді әнші.
Танымал тұлғаның көңіліне кірбін ұялатқан жәйттер де аз емес. Соның бірі өзінің айтуынша, «ең қиыны – физикалық ауырсыну емес, адамдардың екіжүзділігі»
«Өмірде ең қиын нәрсе – екіжүзді, сатқын адамдардың арасында жұмыс істеу. Кейде соғыс майданында жүргендей боласың. Қай күні, қай жерде кімнің «жарылып» кетерін білмейсің», – дейді өзі бұл жайында.
Соңғы кездері думанды кештер мен мәнсіз басқосулардан бойына улақ ұстай бастағанын да жасырмайды.
«Қонаққа барсаң, жұрт телефонын сайлап, аңдып тұрады. Бір ауыз сөзің үшін бәле тауып алуың мүмкін. Сондықтан өзіңді қорғаудың ең жақсы жолы – артық әңгіменің, қажетсіз ортаның сыртында қалу», – дейді ол.
Әлемдік өнер жұлдызы, танымал тұлға бұрын адамдар арасындағы қарысм-қатынаста адалдық, ізеттілік, адамгершілік болғанын алға тартады.
«Жанып тұрған арманшыл, өнерді сүйетін жандармен араласатынмын. Ол кезде менде сенім, рух, мінез, сұлулық – бәрі бар еді. Қазір айналамда сондай жандар азайған сайын, жаным да, тәнім де әлсірей бастағандай. Өткеніме қарасам, қаншама керемет тұлғалармен жолым түйісіпті. Олар маған сәуле шашты, ал мен жанып тұрдым. Бірақ қазір өзімді жоғалтып алғандаймын», – дейді ол.