Жас ақындар марапатталды
Мәдениет және өнерЖариялаған: admin | Уақыты: 2024-10-18 14:55:00 |
Бөлісу: Facebook | Whatsapp | Қаралым саны: 5
Мақтаарал ауданының әдістемелік кабинетінің жылдық жоспары негізінде «Мақтаарал» мектеп-гимназиясының базасында республикалық «Көк тудың желбірегені» атты облыстық жас ақындар айтысының аудандық кезеңі өтті. Бұл іс-шара жас ақындардың шығармашылығын қолдау мен дамытуға, олардың ұлттық рухани-мәдени құндылықтарын сақтауына ықпал етуді мақсат еткен.
Бұл айтыстың негізгі мақсаты – жалпыадамзаттық және ұлттық құндылықтарды бойына сіңірген еңбекқор, адал, саналы және жасампаз азаматтарды тәрбиелеу болды. Ұлттық өнерге бейім жастардың шығармашылық дамуына жағдай жасау – басты міндеттердің бірі. Байқау аясында мектеп оқушыларының рухани-мәдени әлеуетін дамыту, эстетикалық тәрбие жүйесін жетілдіру, олардың белсенді азаматтық ұстанымын қалыптастыру, отансүйгіштік сезімін арттыру секілді маңызды бағыттар қамтылды.
Айтысқа қатысқан оқушылардың барлығы да ұлттық дәстүрлер мен ұлттық рухты дәріптеуді мақсат еткен. Олар айтыс барысында туған жерге деген сүйіспеншіліктерін, отанға деген адалдықтары мен құрметтерін сөзбен өрнектеп жеткізді. Шығармашылық қабілеттері жоғары деңгейде көрінген жас ақындар туған ел мен жердің рухын көтеретін өзекті мәселелерді қозғап, өлең жолдары арқылы көпшілікке ой салып, ұлттық құндылықтарды дәріптеді.
Байқаудың қорытындысы бойынша жүлделі орындарға ие болған жас ақындар анықталып, үздіктері облыстық кезеңге жолдама алды. М.Ғабдуллин атындағы жалпы білім беретін мектебінің оқушысы Әбдіқайыр Жалғас айтыстың жеңімпазы атанып, 1-орынды иеленді. Енді ол ауданның атын облыстық кезеңде қорғап, өзінің ақындық шеберлігін әрі қарай шыңдайтын болады.
Әбдіқайыр Жалғасқа алдағы облыстық кезеңде сәттілік тілейміз! Ол өз өнері арқылы Мақтаарал ауданының мәртебесін абыроймен асқақтатып, жас ақындардың ұлттық өнерді насихаттаудағы үлгісін көрсете бермек. Айтыс өнері – халқымыздың асыл мұрасы, сондықтан осындай іс-шаралар жас ұрпақты ұлттық өнерге баулып, оларды рухани байытып, ұлттың болашақ көшбасшыларын тәрбиелеуде маңызды рөл атқарады.
Бұл байқау Мақтаарал ауданының жастарының шығармашылық әлеуетін арттыру мен рухани-мәдени құндылықтарды дәріптеуде үлкен маңызға ие болды. Алдағы уақытта да ауданның жас таланттары өз өнерлерін шыңдай отырып, елдің абыройын асқақтата береді деп сенеміз.