Жазғы демалысты тиімді пайдалану, ойын-сауық іс-шаралары арқылы балалардың тынығуы ғана емес, зейінін ашуы үшін де қолайлы әдіс. Бұл орайда Мақтаарал ауданында балалардың жазғы сауықтыру лагерлерімен қамтылуына үлкен мән беріліп отыр. Өз қатарластарымен бірге демалысты көңілді өткізуі үшін лагерьлерде барлық жағдай жасалуы керек. Аудандық білім бөлімінің мамандары бұл талапты үнемі өз бақылауларында ұстауда.
Соның дәлелі болар, жақында Абылайхан атындағы №2 мектептің жанынан «Балдәурен» атты жазғы сауықтыру лагері ашылды.
Балаларды қорғау күніне орай лагерь көңілді кеш ұйымдастырып, жас өрендерді жинады. Салтанатты жағдайда өткен лагерьдің ашылу іс-шарасына балақайлармен бірге ата-аналары да келіп, көз қуантып қайтты.
Осы мектептің директоры А.Джулдибеков жазғы лагерьдің ашылуымен құттықтап, барша балаларды жазда өздері үйреніп қалған білім орасына салауатты өмір салтын құруға, қызықты ойындар ойнап көңіл көтеруге шақырды.
Айта кету керек, «Балдәурен» лагері жаз мезгілінде 360 баланы қамти алады. 100 балаға арнап тегін ыстық тамақ беруді де ұйымдастырып отыр.
Мерекелік іс-шарада Мақтаарал ауданының білім бөлімінің басшысы міндетін уақытша атқарушы Қайрат Арап және білім бөлімінің әдіскері Есболов Ермахан сөз сөйлеп, балаларды мерекемен құттықтап, бақытты балалық шақ тіледі.
Салтанатты ашылу рәсімінде өнерлі оқушылар ән айтып, би биледі. Мектеп ұстаздарынан құралған демеушілер тарапынан 500 оқушыға балмұздақ таратылып, 100 оқушыға киім-кешек, мектеп құралдары сыйға берілді.
Дүниеде баладан асыл, сәбидің күлкісінен қымбат қазына жоқ. Бүлдіршіндеріміздің езуінен күлкі кетпей, аспандары ашық, қуаныштары көп болсын!
